නෙත සිත පිනවන මනහර කඩදාසි කුරුලු කලාව

විශේෂ ස්තුතිය -  HondaMPLG - උපුටා ගැනීමකි.........


ඉතා මනස්කාන්ත ලෙස දිස්වන මෙම නානා වර්ණැති පක්ෂීන් හැබෑවටම ජීවත් වන්නන් නොවන බව කිව හැක්කේ කාටද,? ඒ තරමටම තාත්වික ලෙසත්, සියුම් හා සංකීර්ණ නිමාවකින් යුතුව නිර්මාණය කෙරී ඇති මෙම වර්ණවත් පක්ෂීන් විසිහය හැවිරිදි කලා ශිල්පිනියක වන ඩයනා බෙල්ටුන් හෙරාරාගේ විචිත්‍ර නිර්මාණයන් අතුරින් කීපයකි. වර්ණවත් ප්‍රංශ කඩදාසි, සිලිකන් මැලියම්, කම්බි, ඇලවුම් පටි, දියසායම්, තීන්ත හා කතුරු වැනි මෙවලම් හා ද්‍රව්‍ය රාශියක් උපයෝගි කර ගනිමින් නිමැවෙන මෙවැනි එක් පක්ෂියෙකු නිර්මාණය කිරීමට ඩයනාට සති කීපයක කාලයක් ගතවන බව පැවැසීම පුදුමයට කරුණක් නොවේ.


වර්ණවත් කඩදාසි ඇසුරෙන් නිර්මාණය කිරීමේ කලාවට ඩයනා අවතීර්ණ වන ලද්දේ ඇය ආර්ථිකමය වශයෙන් දුෂ්කර කාලපරිච්ජේදයකට මුහුණ දී සිටි සමයේදී එකී ගැටලුවලින් ගොඩ ඒම සඳහාය. මේ සඳහා අවශ්‍ය කරන කඩදාසි සිය නිවසෙන්ම සපයා ගැනීමට හැකි වීම ඇයට විශාල පහසුවක්ද වී තිබිණි. කෙසේ වුවද කොලොම්බියානු ජාතික ඩයනා හෙරාරා ස්වභාවධර්මයේ හා පරිසරයේ සුන්දර ඉසව් සිය නිර්මාණ ඔස්සේ පිළිබිඹු
කිරීමට පෙළඹෙන ලද්දේ ෆින්ලන්තයේ හෙල්සින්කි නුවර නියැළුණු සංචාරයකින් පසුවය. තමා තුළ පරිසරය කෙරෙහි වන ඇල්ම ඇය හරිහැටි අවබෝධ කරගෙන ඇත්තේද මෙම සංචාරයේදී වන අතර එම ස්වභාවදහමේ එක් සුන්දරතම ජීවී කාණ්ඩයක් වන පක්ෂීන් වර්ණ කඩදාසියෙන් නිර්මාණය කිරීමට ඇයට මුල්වරට පෙළඹවීමක් ලැබෙන ලද්දේ මෙම සංචාරයේදීය.

සොබාදහමට ගරු කිරීමත් අගය කිරීමත් කෙරෙහි දැඩි උනන්දුවක් දක්වන ඩයනාගේ විශ්වාසය නම් කලාව මගින්ද එම අරමුණු ඉටු කරගැනීමේ හැකියාව ඇති බවය. සිය කලාත්මක නිර්මාණ සඳහා අන් කිසිවක් නොව කඩදාසිම යොදා ගැනීමට ඩයනා පෙළඹී ඇත්තේ ඒවා සුලබව ලබා ගත හැකි අමුද්‍රව්‍යයක් වන නිසාය. එබඳු සුලබව ඇති ද්‍රව්‍යයන් යොදා ගනිමින් නිර්මාණ කලාවේ විවිධ අත්හදාබැලීම් සිදුකිරීම් ඩයනාගේ ප්‍රියතම විනෝදාංශයකි. ඉදිරියේදී බ්‍රිස්ටල් නුවර පිහිටි විශ්වවිද්‍යාලයකට ඇතුළු වී දැව හා පිඟන් මැටි මූර්ති කලාව පිළිබඳව හැදෑරීමටද ඩයනා බලා‍පොරොත්තු වෙන් සිටියද ඇගේ මූලිකම අභිප්‍රාය නම් කඩදාසි නිර්මාණ කලාව හැකි ඉහළම තලයකට ගෙන යාම බව පැවැසේ.